من كم يوم قرأت تدوينات كتبتها في بداية مدونتي
وانصدمت بكمية التغيير اللي صار لي خلال الفترة القصيرة هذه
عجيب شلون نكبر! واللي يفرّح ان نشوف نفسنا صرنا احسن من اللي كنا عليه،
الاشياء اللي كانت قبل رعب وبعيدة جدا وصعبة صارت حاليا سهلة اسهل من شرب الماي
وكل شكواي القديمة والشغلات اللي كانت زاعجتني قبل بطلت تزعجني حاليا !
ان شاء الله يجي يوم وتصير فيه سوالفي عن امراضي ماضي رغم اني ما اشارك عنها
فخورة جدا بالتطور اللي يصير لي واللي بيستمر ويصير احسن منه ان شاء الله
من كم سنة، حلمت بأمي مثل العادة، وبالحلم قطعنا انا وياها وعد : انها تجيني بالحلم المرة الجاية وانا بنتها اللي تفتخر فيها، ما كنت ادري وقتها ان بتصير كثير موانع تخلي المرة الجاية هذي تكون بعيدة جدا، للآن ما جتني مرة ثانية، بس كل يوم يمر يخليني متحمسة اكثر واكثر للحلم هذا، عقلي كثير يتخيل سيناريوهات شو ممكن بكون عليه لو هي موجوده الحين.
عجيب! كيف صارت لي فرصة احقق وعدي هذا اللي ما توقعته يصير
الحمدلله لكونه دائما معي ويبعد عن طريقي كل سوء
الحمدلله الذي ما زرع في قلبي يوما رغبة لشيء إلا وعندي قابلية تحقيقه
اتمنى من كل قلبي ان يكون الجاي احسن وان يرزقني الله الصحة لأعيش القادم
ان شاء الله ما اخسر شي او شخص ممكن يغير طريقي الحالي
ان شاء الله القادم افضل للجميع .

ليله هادئه مع القليل من نسمات الجو الرائعه
مع عودة ابوي بعد غياب يومين
والانسان حاسس انه عايش فوق السحاب!
اعيش في زِحام من النعم، الحمدلله.



مشروب الليلة حليب دافئ وشويه عسل
وبعدها تجي احلى نومه هانئه .


ليله سعيدة يا زوار .

اليوم قررت اسوي مع نفسي تحدي
من اليوم وإلى الأبد راح احاول اقول اللي بقلبي
ماراح اجمّل الكلام عشان الناس ومشاعرهم على حسابي
لازم ابطل اقول للناس اللي ودهم يسمعوه واضم بداخلي اللي ابغى اقوله!
انا الاهم هنا وانا بس اللي استاهل اهتم بمشاعري.
منو راح يهتم فيني اذا انا ما اهتميت بنفسي؟.

اكرهوني على رأيي هذا لو تبون
بس انا طول عمري متأكدة ان المرأة مو مساوية للرجل
المرأة احسن من الرجل بكل شي!
طريقة تفكير المرأة وعقلها اكبر من الرجل بما لا يقل عن 5 سنوات
ممكن تشوف اثنين رجل وامرأة بنفس العمر
وعاشوا نفس التجارب بس بتشوف المرأة احسن
عقلها اكبر وطريقة تحليلها للأمور احسن إلا في حالات نادرة جدا جدا جدا
انت بمجرد ما تشوف حياتك والنساء المحيطات حولك راح تكتشف هذا الشي!
إلا في حالة كونك غبي ماراح تحس فيه !
ممكن تشوف وحدة موظفة وأم ومهتمة ببيتها واطفالها وعندها وقت لنفسها بعد
ومو مقصرة مع احد سواء زوجها او اطفالها او حتى نفسها وصديقاتها
وبالمقابل يكون زوجها نايم من يرجع من الشغل لحد ثاني يوم
"لان حرام كان بالشغل وتعبان"
واذا كان هو اللي يشتغل شغلها بيكون نفس الشي او بعد اتعس
مو مهم شو المجهود اللي تسويه هي،
راح يتم يشوف نفسه هو اللي تعبان اكثر وهي كانت فاضيه طول الوقت.
المجهود اللي تبذله المرأة بأي زواج اضعاف المجهود اللي يبذله الرجل
اللي مسؤول عن تربية اي طفل بالعالم وتعليمه غالبا هي الام مو الاب
وممكن حتى تشوف ان مصدر دخل بعض البيوت هي الزوجة مو الزوج
اللي يبقي اي زواج قائم هي المرأة مو الرجل
لو انفصلوا اي زوجين سواء بطلاق او موت احدهم
دائما بيكون الرجل اللي يتزوج اول مو المرأة
واللي يبغون يتزوجون من الرجال عددهم اكبر بكثير
هذا لوحده يثبت ان الرجل ما يقدر يعيش بدون امرأة بحياته
بس المرأة جدا جدا ممكن تعيش بدون اي رجل لان هو ماراح يسوي شي لها
غير يزيد الحمل اللي هي شايلته بحياتها !
انا متأكدة دائما ان عالم تحكمه النساء احسن بمليون مرة من عالمنا الحالي
محد راح يقدر يغيرلي هذي الفكرة بحياته لان فكرتي مو من كلام بس !
طول العشرين سنة اللي عشتها ما شفت اي رجل بالعالم احسن من المرأة بشي !
اي انا اكره الذكور واكره اللي ما يؤمنون بقدرة المرأة اكثر من البقية
واي واحد يشجع على زيادة التفرقة بين النساء والرجال
العالم راح يكون مكان جدا افضل بدونه.

اللهم صلِ وسلم على نبينا محمد.

اكثروا من الصلاة على النبي،
ولا تنسوا سورة الكهف يا زوّار .


أحبكم.

شو فيها الحياة شادة حيلها معاي!
هذا وغداي كان مندي ولبن،
المفروض ترقص لي.