مرحبا .
اليوم بقول لكم عن شيء صار معاي امس بالليل ..
سألت صديقتي من وين تشتري فساتينها عاجبني اللي تلبسه، وانا اصلا في فترة ابغى اغير اللي عندي.
هي ما قصرت وعطتني الصفحة عالانستا.
وللامانة كل شي فيها كان وااااو. عارفين الستايل الكوري ذاك الكيوت والسوبر لطيف؟ ايوه بالضبط ذاك، انا قلت مستحيل الشغل يكون كذا عالحقيقة ورحت اشيك الريفيوز حق الزباين 《 الثقة فالوثيقة مثل ما يقول لك
وانا اقلب لقيت صورة موديل بنت
وربي نسخة طبقة الأصل مني !
لدرجة قلبي نط من مكانه فكرت حد سارق صورتي ومنزلها
لين انتبهت ان اللبس ماعندي نفسه،
والغرفة تختلف كليا عن غرفتي
سبحان الله فعلا ، جلست اقولها وانا في حاله عدم التصديق.
البنت نسخة مني بس ناقصها شاماتي.
قررت فالليل امقلب قروب البنات عشان اعرف من منهم حافظة ملامحي عدل
ورستلهم صورة البنت ع اساس انها انا وقلتلهم شو رايكم فاللبس اشتريته جديد.
والصدمه، ان ولا وحده منهم انتبهت انها مو انا اللي فالصوره
قامو يمدحون اللبس ويسألون من وين اشتريته عشان يشترون مثله
يعني ما يكفيني خفت وقلبي طاح من مكانه ولا جتني خيبة امل فاللي اسميهم واللي مفروض يكونون صديقات عمري 《 خيبه املي فيهم ما تتوصفش
لما خبرتهم انها مو انا ، طبعا بعد شلال من البهذله
منهم قالوا انهم استغربوا شلون زاد وزني فجأه كذا
بس الملامح جلسوا يحلفون كأنها توأمي ، وللامانة مالومهم.
حتى اخوي الكبير انصدم لما سويت له منشن، جلس يقول وربي تشبهك صح
ورحت لأبوي اسأله يمكن خلقنا اثنين توأم وهي سرقوها من المستشفى وزانت لها الدنيا بدوني 《 طبعا عطاني نظرة ال "اللهم طولك يا روح ".


-
ابغى اختصر وقلت قصه حياتي .

حسنا، أراكم لاحقا ولا تنسوا سورة الكهف والصلاة على النبي .

نوبة اكتئاب جايه؟ مع نفسها!
حان وقت الهروب والغرق في الشغل ثم الشغل ثم الشغل
حتى يحدث الـburn-out التمام ثم ينهار كل جزء فيني،
ثم ادخل في نوبة اكتئاب مختلفة عن الـ.. إيه دا لا استني…




اراكم لاحقا.

قصيت شعري اليوم بطريقه كيوت، حبيت النتيجة جدًا
الوضع كأني وقعت بحب نفسي من أول وجديد .
عندي ماضي طويل عريض مع قصات الشعر كلهم
تقريبًا كانوا تجارب فاشلة لأني اقص لنفسي..
المشكله شعري بسرعه يطول ولأني خليته لوقت طويل
وحبيته رغم بعض التعليقات المزعجة..
بس خلاص حان وقت التغيير .

امس قعدت أتكلم مع أخوي عن أن من
زمان حابة اقصه لين أزعجته وقال "قومي قصيه"
يبغى بس يخلص مني
وقمت بدون تردد لبست وطلعت للصالون،
الموضوع أخذ وقت طويل لأن البنت كانت تقص
لي خصلة بخصلة وبوسط العملية
قعدت أفكر ليش نعذب نفسنا كذا ؟
بس التغيير لطيف كان لين نص ظهري وقصيته لين كتفي
مع إني لاحظت أني صايرة ما أقدر أثبت على الطويل.
شكلي بعتمد هالقصه الحاليه كشيء ثابت.. من يدري!.

خالتي امس سوت لنا مفاجئه،
متزوجه واحد سعودي وفجأه زارتنا
وللان بيتنا مقلوب فوق تحت
والمطبوخ معفوس
واختكم اعيشك فجأه صارت شيف.

للان فقط سويت القهوة مع الرطب،
والحين ببدا بالريوق، اشياء خفيفه لطيفه.

بالمناسبه، انا وولد خالتي اللي عمره ما يتجاوز العشر سنوات،
دخلنا بنقاش مضحك حول اللهجات،
هم يقولوا مويه ونحن نقول ماي،
احاول اتكلم لكن بكل مره يضحك على لهجتني
اه يا زين لهجتهم .
ولا بُد ان ابوي بيسوي عزيمه وبيعزم الكل،
امس جلست تقول ماله داعي ومن هالكلام،
فجأه ابوي قال " أنتِ الغالية اخت الغالية "
ويقصد فيها أُمي.
يا حَبيبي يا أبوي

خلاص الان لازم اختفي،
عندي ألف شغلة،
اراكم لاحقا.

انا إنسانه متوترة بشكل عام
اموت على الرتابة والروتين تعطيني
شعور بالسيطرة على كل التفاصيل
والله وكيلكم اخر شهر مافيه يوم مثل الثاني
وكلها امور مستقبلية ما اقدر اتحكم فيها!.

الحمدلله الذي لا ينسى من ذكره،
الحمدلله الذي لا يخيب من رجاه،
الحمدلله الذي من توكل عليه كفاه،
الحمدلله الذي من وثق به لم يكله إلى غيره،
الحمدلله الذي هو ثقتنا حين تسوء ظنوننا بأعمالنا،
الحمدلله الذي هو رجاؤنا حين ينقطع الحيل والحبل منا.