06-24-24, 11:03 AM
| #1621 | |||||||||
 
|  الآية ٤٨ - سورة القلم فَاصْبِر لِحُكْمِ رَبِّكَ وَلا تَكُن كَصَاحِبِ الْحُوتِ إِذْ نَادَى وَهُوَ مَكْظُومٌ أول قصص قرآني نزل على سيدنا النبي موقف سيدنا يونس من قومه لما يأس منهم اللى اتذكر في سورة القلم.. إشارة وتنبيه وتوجيه وتحذير لسيدنا النبي وهو في بداية الدعوة إن الطريق صعب وشاق ومهما اتكذب إنه لا ييأس أبدا، ولا ياخد قرار بخصوص الدعوة بدون وحى، ومهما كانت النتائج مش مطلوب منه غير إبلاغ الدعوة.. درس لينا بعدم التسرع والصبر على التغيير (خصوصا في معركة الوعي) ومحدش يتوقع إنه هيلاقي تأييد وترحيب من الناس وإن العبرة بتوصيل الرسالة وليست بالاقتتاع بيها.. ** الخلاصة في تدبر الدروس المستفادة من قصة سيدنا يونس:- - النتائج على الله والتوفيق من عند ربنا عز وجل - مش مطلوب مننا غير السعي والمجهود والصبر فى توصيل المحتوى - محدش يتوقع ولا ينتظر تفاعل وترحيب (لايك أو شير) | |||||||||
 |
|
06-24-24, 11:30 AM
| #1622 | |||||||||
| (خريطة الكهف ٢) (مفتاح الخريطة) عشان نفهم السورة بشكل عام محتاجين نشوفها من فوق كدة على شكل خريطة.. إزاى - سورة الكهف ١١٠ آية.. - القصص القرآنى فى السورة ٦٩ آية (أكتر من ٦٠٪ من السورة قصص) ودى أحسن وسيلة لتوصيل المعلومات والطلوع بالدروس المستفادة من تدبر القرآن.. - باقى الـ ٤١ آية عبارة عن تعليق أو تأكيد على كل قصة فى السورة.. - المحور الأساسى للسورة تقوية العقيدة عشان الحماية من (الفتن) زى معظم سور القرآن المكى.. #القصص_القرآنى ١- قصة أصحاب الكهف (من الآية ٩ - ٢٦) موضوع القصة (الفتنة فى الدين) وإزاى الفتية (الشباب) احمتو فى الكهف (فَأْوُوا إِلَى الْكَهْفِ) عشان يحافظو على دينهم من فتنة الكفر والشرك بالله.. ٢- قصة صاحب الجنتين (من الآية ٣٢ - ٤٣) موضوع القصة (الفتنة بالمال) وإزاى الواحد ما يتغرش بفلوسه أو قوته عشان كل ده ممكن يروح فى لحظة (قَالَ مَا أَظُنُّ أَن تَبِيدَ هَذِهِ أَبَدًا) ٣- قصة سيدنا موسى والعبد الصالح (من الآية ٦٠ - ٨٢) موضوع القصة (الفتنة بالعلم) وإزاى الواحد يكون عارف إنه مهما اتعلم وحصل على أعلى الشهادات والدراسات برده فيه حد أعلم منه وعنده خبرات أكتر منه (قَالَ لَهُ مُوسَى هَلْ أَتَّبِعُكَ عَلَى أَن تُعَلِّمَنِ مِمَّا عُلِّمْتَ رُشْدًا) ٤- قصة ذى القرنين (من الآية ٨٣ - ٩٨) موضوع القصة (الفتنة بالمنصب والسلطة) وإزاى الواحد لما يتولى منصب يقدر يستغل النعمة دى فى تطوير حياة الناس وتعليمهم وتحسين حياتهم ويفهم إن ربنا جعله سبب للمهمة دى (إِنَّا مَكَّنَّا لَهُ فِي الأَرْضِ وَآتَيْنَاهُ مِن كُلِّ شَيْءٍ سَبَبًا) | |||||||||
| |
|
06-24-24, 11:32 AM
| #1623 | |||||||||
| الآية ٢ - سورة الحجرات يَا أَيُّهَا الَّذِينَ آمَنُوا لا تَرْفَعُوا أَصْوَاتَكُمْ فَوْقَ صَوْتِ النَّبِيِّ وَلا تَجْهَرُوا لَهُ بِالْقَوْلِ كَجَهْرِ بَعْضِكُمْ لِبَعْضٍ أَن تَحْبَطَ أَعْمَالُكُمْ وَأَنتُمْ لا تَشْعُرُونَ من أول يوم اتفقنا إن القاعدة الأساسية في التدبر أشوف نفسي في كل آية في القرآن وأكون فاهم إن الآية بتخاطبني أنا بشكل مباشر.. طب إزاى أطبق القاعدة دى في آية نزلت بسبب واقعة محددة في وجود سيدنا النبي وأنا حاليا مش عايش وما عيشتش أحداث الآية دى ؟!! أولا لازم أفهم إن التدبر لآيات القرآن بيكون (بعموم اللفظ لا بخصوص السبب).. يعنى الآية بتكون عامة في الإستفادة والتدبر واستخلاص الدروس والعبر منها، بغض النظر نزلت امتى وفين وليه وعلى مين.. ثانيا لما أفهم كدة يبقى مع تطبيق الآية عليا بشكل مباشر يبقى التدبر اللى فيها انى ماينفعش أرفع صوتي فوق صوت النبي.. رفع الصوت في الأحكام والتعاليم.. وأفهم إني لازم أقدم رأي سيدنا النبي وتعاليمه ووصاياه قبل رأيى حتى لو ضد أهوائي ورغباتي.. ثالثا وده مهم جدا أفهمه من سياق السورة اللى اهتمت بآداب المجتمع وتنظيم شؤونه إني أدى لكل واحد قدره ومكانته، اللى أعلى مني في العلم والخبرة والتخصص والاقدمية أحترم رأيه وأتواضع معاه | |||||||||
| |
|
06-24-24, 11:33 AM
| #1624 | |||||||||
| الآية ٢٧ - سورة الشورى وَلَوْ بَسَطَ اللَّهُ الرِّزْقَ لِعِبَادِهِ لَبَغَوْا فِي الأَرْضِ وَلَكِن يُنَزِّلُ بِقَدَرٍ مَّا يَشَاء إِنَّهُ بِعِبَادِهِ خَبِيرٌ بَصِيرٌ ملخص الآية دى إن فيه ناس كتير الفقر والضعف والمرض دوا ليهم وده تمامهم.. تضييق الرزق عليهم حماية ليهم من نفسهم، عشان لو قدروا أو لو مسكوا سلطة ومنصب أو لو بصحتهم أو لو اشتهروا أو لو اغتنوا هيكونو خطر على نفسهم وعلى المجتمع.. لذلك إرادة ربنا عز وجل إنه لم يوسع في رزق الكل، ويجعل فينا القوى والضعيف، الغني والفقير، المتعلم والجاهل عشان كلنا نحتاج لبعض.. ** تدبر أسماء الله الحسنى اللى اتختمت بيهم الآية (الخبير - البصير) يطمنا إن الحمد لله ربنا بيدبر شؤؤونا | |||||||||
| |
|
06-24-24, 11:33 AM
| #1625 | |||||||||
| الآية ٥٢ - سورة الزمر أَوَلَمْ يَعْلَمُوا أَنَّ اللَّهَ يَبْسُطُ الرِّزْقَ لِمَن يَشَاء وَيَقْدِرُ إِنَّ فِي ذَلِكَ لَآيَاتٍ لِّقَوْمٍ يُؤْمِنُونَ تمام الراحة النفسية إنك ماتركزش مع حد ولا وتشغل نفسك برزق بغيرك سواءا في بيته أو شغله أو ولاده أو عربيته.. تمام الراحة النفسية الرضا بما قسمه الله لك.. ربنا وحده عنده علم العباد، عليم بشؤون خلقه.. خبير بمصلحة كل واحد.. موزع الأرزاق على العباد بالتساوي وبالعدل حتى لو إحنا مش شايفين كدة بنظرتنا المحدودة للأمور.. النصيحة الأهم افتكر إن الصورة الأخيرة اللى إنت شايف غيرك عليها دي، في كام صورة تانية غيرها ماتعرفش عنها حاجة ربنا وحده اللى يعلم.. | |||||||||
| |
|
06-24-24, 11:34 AM
| #1626 | |||||||||
| الآية ٢٨ - سورة ص كِتَابٌ أَنزَلْنَاهُ إِلَيْكَ مُبَارَكٌ لِّيَدَّبَّرُوا آيَاتِهِ وَلِيَتَذَكَّرَ أُوْلُوا الأَلْبَابِ القرآن اللى معانا ده كتاب مبارك وفيه كل البركات والخيرات وكنوز لا حصر لها.. كتاب الهدى للصراط المستقيم في الدنيا والآخرة.. كتاب إخراج الناس من الظلمات إلى النور.. الشرط المطلوب للاستفادة من خيرات الكتاب ده هو (التدبر) التدبر والتفكر وإعمال العقل في كل آية.. العمل بأوامره، والبعد عن نواهيه.. أخاطب نفسي بكل آية في الكتاب وأشوف نفسي فيها واطبقا واقع عملي في حياتى.. السر الأعظم في (التدبر) هو إنى أكون فاهم وعارف إن كل آية في الكتاب ده بتخاطبنى وبتكلمنى أنا بشكل شخصي الخلاصة داخل كل آية عدة رسائل، سواءا رسائل مباشرة أو غير مباشرة.. ودورك كشخص متدبر للقرآن إنك تقرأ الرسائل دى وتفهمها، وتحللها، وتربطها بواقعك، وتشوف إزاى تقدر تستفاد منها.. (التدبر هو القدرة على صناعة التغيير) | |||||||||
| |
| إضافة رد |
| مواقع النشر (المفضلة) |
| |
 | أصدقاء منتدى مسك الغلا | | |||||
2813Likes
