نافذة إليّ

صباح الورد

أنا زعنانة وفرحانة كمان >> ليه ما في فيس نص زعلان ونص فرحان؟؟ نرجوا من القائمين على المنتدى توفير ذا الفيس

المهم أنا فرحانة عشان جانا بيبي زعنون
وزعلانة لأني مو موجودة

في بيبي محترم يجي على الدنيا وعمته ماهي موجودة؟؟ مش عييب؟؟

من أمس وأنا مزعجتهم بالاتصالات ،، وآخر اتصال قبل شوي وتهزأت

قالت أختي أزعجتينا باتصالاتك خيير فاضيين لك احنا؟؟

قلت لها أبي أشوف صورته اليوم

قالت نايم وماني فاضية يلا طيري -_-
تبين تشوفينه تعالي..

ما هو أنا لو كنت أدري كان سافرت أمس بس وش يعرفني؟؟

أنا كنت أصلا باقولها تسمعني صوته وهو يبكي بس يوم شفتها متنرفزة حفظت ما تبقى من ماء وجهي

جايتهم بكرة باذن الله وأشبع بخديداته الحلوين الله الغني عن خدماتهم -_-

أمل وش سالفة ال 53 لايك!! ههههههههههههههه

مو أنا والله لا تناظريني كذا،، روحي دوري معجبينك

أنا ترى إذا شديت حيلي قريت آخر صفحة وإذا مكسلة آخر رد
يعني 6_7 لايكات بالكثير

المهم ،، سلفينا شوي من معجبينك

دخول متفلسف على غير العادة ،،

بتكلم عن أديب وكاتب راقي جدًا جدًا ..

أسلوبه الجميل،، عباراته العذبة واللطيفة الي تلامس القلب مباشرة ،، خطابه للقارئ الي يحسسك انه فعلا جنبك وانه قاعد يقول هالكلام لك انت مخصوص وكأنك تسمع هالكلام بصوته

الصياغة السلسة ،، وتقسيم المواضيع،، وعدد الصفحات،، وترتيب الكتابة كل شي في كتبه إبداااع من قلب ..

كتبه ببساطة هي الفائدة مع السهولة،، ما فيها تعقيد ولا تحتاج قعدة وتركيز

أنا عن نفسي أقرأ الكتاب وانا ماشية ،، وانا أطبخ ،، وانا في السيارة،، قبل ما انام عادي ما تحتاج تركيز وحوسة أي وقت فراغ لو دقيقتين تقدر تقرأ فيه ،، يعني وجبة سريعة

أدهم شرقاوي مبدع حقيقي ،، حاليا أقرأ له كتاب "أنتِ أيضًا صحابية" جميل جدددا

ولأنه من طبعي نشر العدوى ،، أرسلت الكتاب لأختي وصديقاتي 😁♥️

صباح العصافير ��

سمعت صوت سو سو سو سو سو جاي من حوشنا
طلعت لقيت ولد عمتي جايب هذول


أول ما تشوفهم أمي بتقلع هو وياهم براا هههههههههه

شوفتهم رجعت لي أيام الطفولة،،
كنت أروح بيت خالي أشوف ولد خالي شاري منهم وأتحمس وأخليه يجيب لي كمان واوديهم لولد عمي لأنه ممنوع يدخلون حسب قوانين الغالية

أصحى من صباح ربي خير وأروح بيت عمي والسعادة تشعشع من عويناتي وأزعجهم وأصحيهم عشان أشوف كتاكيتي

وبالأخير ألاقي ماتوا

أبكي واسوي مناحة عليهم وطبعا ياكلها ولد عمي أقوله انت ما تعرف تهتم فيهم>>> وساعة وجه راميتهم عليه وبعد أتشرط

أنا ما أحب اشيلهم أو المسهم بس أطالعهم من بعيد لبعيد

ااخ وتزيد غبنتي اذا رحت بيت خالي ولقيت كتاكيته بعدهم موجودين وما ماتوا

ما ضرَّ لو ودَّعتني؟؟
ومنحتني فصل الخِتام ..

مساء البراءة المخلوطة بلسان طويل
أو الصدق هو لسان طويل مخلوط بشوي براءة 😂

كل كم يوم ألاقي اختي الصغيرة حاطة تقريبا نفس هالحالة في كبتي
https://www.raed.net/img?id=228288
https://www.raed.net/img?id=228286

واليوم تطور عندها الوضع شوي وكتبت قصة
https://www.raed.net/img?id=228289
طبعا القصة تحتوي على شكر واعتذار وكل شي ،، وأكثر شي ضحكني في الرسمة الي مدري كيف قايلة الحواجب هههههههههههههههههه
مدري ليه مخلية حواجبي كذا معلقة فووق😭🤣
والا النظرات الشريرة الي تناظرني فيها ههههههههههههه هذي عاد ما ظلمت نفسها فيها

على قد ما هي ملسونة وترفع الضغط الا انه الواحد ما يقدر يزعل عليها