نفسيتي تحسنت اليوم الحمد لله
جوي تحسن واكتمل يومي
حصلت معاي اشياء لطيفة وحلوه
احس بالسعادة اتبسمت لنهاية اليوم
ضحكت كثير
لدرجه صرت اسمع اغاني
وارقص بالمطبخ وانا اسوي شاي.

قبل المغرب رحت اخذ ورد
فيني هوس واعشقها
شريتها وحطيت ورد في كل زاوية بالبيت
احسها تحيي المكان
تعطي طاقة ايجابية مذهلة
تمتص تعبي
حتى عندي نظرية
احس انها اذا تواجدت في
مكان سلبي تموت بسرعة
لانها تاخذ سلبياته وتطيح الأوراق
من طبقات الصوت العالية
فعلاً حاجة جميلة ان الورد
يسبب لي طاقة حلوه
هي حاجة لطيفة بحد ذاتها .

اليوم ترخصت من بدري
رجعت البيت ومالقيت احد فيه
ابوي بالدوام ويبدو انه بيطول
واخوي معزوم عند صاحبه
هنا للمرة المليون حسيت بشعور موحش

اهه دائمًا اتمنى لو عندي اخت .
هو بالاصل عندي اخت توأمي
لكنها توفت اول ما انولدت
وهي اكبر عني بدقيقة،
عساها طير من طيور الجنة..

المهم ميته جوع،
بس قبل كل شيء لازم اكشخ لنفسي
سويت اظافري وفكيت شعري
ولبست شي مريح
بعدها سويت لي اكل سريع سريع
سلمون بالقلاية الهوائية
مع سلطة جرجير غرقانه ليمون،
لذييذة يا بنات جربوها.




هنا حسيت في شيء ناقصها
و تا-دااا .



يلا الحين استأذن
بعيش اجمل لحظاتي بهذا اليوم .

اكثر لحظة شاعرية اعيشها بيومي
هي لحظة ما اوقف قدام المرايا،
واطالع نفسي برضا
سواء من ناحية روحي وافكاري وملامحي،
أحب لحظة ما اقابل نفسي واشوفها،
احب اشوفني،
واتوقع هذا انتصاري بالحياة،
اني أحب أشوف نفسي، وألمس روحي،
شيء عظيم..

بالنهاية الأمر أنا أحب شخصيتي، أحب تفكيري
أحب حبي للحياة، أحب إني سعيدة
أحب نضجي، أحب عاطفتي
أحب قوتي، أحب رقتي، أحب أنوثتي
أحب عقلانيتي، أحب تفاصيلي، أحب جمالي
أحب عيوني، أحب ضحكتي، أحب صوتي،
والله أبد مو عادية.