لايشوف العز مثل المذلة

‏"الواحد اللي ما يعرف المعاناه
يمكن لا شاف الشمس يبلش بظلّه

تلقى الكلام اللي يجيبه من اقصاه
نفس الكلام اللي يردّه محلّه

تحايله كنّ اكبر همومك رضاه
و تقلّبه كنّك تقلّب مجلّه

ماهوب ليل اسامره و اتعدّاه
ولا طريق ادوّره لين ادلّه

اقسى عليّ من السهر و المحاتاه
و اثقل علي من الليال المملّة

قال : الرجل عشان يوصل لمشهاه
لازم يعرف الحاصل و يستغلّه

قلت الاكيد ان العدل و المساواه
تضيع في حبّ البنادم و غلّه

ربتني الدنيا على الحمد لله
عندي يقين و عنده الامر كلّه

على الطريق اللي عيوبه مزاياه
ماكنت اعقد الحبل عشان احله

ياما رميت الحزن لـلا مبالاه
و ياما صنعت الضحكة المسفهلّة

دليلي انّ الحظ لا ضاع ابلقاه
احساس و الاحساس سيد الادلّه

الادمي من مولده لاخر خطاه
اقصى مداه اخر حدود الجبلّه

لاصار ما حدّه سكوته لشكواه
يخسر كثيره و يتسامى بـ اقلّه

خلّه يشوف الظلم مثل المحاباه
ولا يشوف العز مثل المذلّة "