يا نسمة هبت مع الليل بحري
يفرح بها القلب الرقيق الهواوي
معها عبير الورد و العطر نثري
و الغيم و القمرا وكل الحلاوي
بدري على مسراك يا ليل بدري
ما تدري إني نور قمراك هاوي
وش عاد لو تلعب علينا السمكري
دام البخور يثور و العود جاوي

الوسم

يا أجمل خيالٍ مع الأطياف كونته
وأعز حلمٍ على طوعي تبنيته
حب(ن)شرى بالغلا حبي ومكنته
يا ليت يبقى مع الأيام يا ليته
لنامت العين في نومي تخيلته
وإن كنت صاحي مع الطيف وتحليته

الوسم

هرب من نفسه لصمته يدور فالسكوت بلاد
تعب من كثر مايكتب ولا يفهمه من يقرا

يطيّر فالفضا روحه يقولون الحروف قياد
نذر لأجل البحر عمره وقالوا هالبحر صحرا

يعيرونه بقايا اذان ماتسمع شقا النشّاد
امانيهم معاسيل الكلام وسلهمة عذرا

عبث يزرع اراضي بور ماتكرم رجا الحصّاد
عبث يشعل حطام الشمع في ليلة شتا غدرا

وتسأل ليه ما يتبع رفيف البارق الرعّاد
وهو في صمته الممطر حكايا روحه الخضرا

جماهيره جروحٍ كل ما هب القريض وجاد
تباشر تحضن حروفه تخلد دمعته ذكرى