منتديات مسك الغلا - عرض مشاركة واحدة - كل الحكايه عندى هوايه وكل هوايه ولها حكايه

**ذات بهجه** · 04-06-25, 11:01 PM

طبعا فى الاول مكنتش حابه الفوتوشوب
علشان كنت بحسه برنامج فى ادوات او بمعنى اصح خانات كتير
مش قادره افهم الخانه دى بتاعت ايه وايه فايدتها
لحد ما وصلنا نت والكلام ده فى عام 2003
ومش وصلنا نت بالمعنى الحرفى لاء ده كان فى
رقم بنحطه اللى هو 07777777
وبندخل على النت عن طريقه

واعتقد ان اغلبية الناس كانت كده
وكان بطئ جدا علشان تفتح صفحه تاخد ساعه

ومش بنلحق نتصفح بضمير ومن خلال التصفح
كنت ببحث عن شرح للبرنامج اللى عندى ده

وطبعا مكنش فى يوتيوب او فيديوهات للشرح غير
الشرح بالصور عن طريق المنتديات اللى كانت موجوده وقتها
وكانت فى منتديات مترضاش تفتح الا اذا سجلت عندها

وكنت بطلب من اخويه يسجل علشان هو اللى معاه ايميل

وكان بيبحث عن الشروحات ويحفظلى الصفحات بتاعتها
وبمناسبة التسجيل بقى (فكان فى منتدى نسائى كنت نفسى اسجل فيه طلبت من اخويه يسجل المهم اخويه سجل على اساس انه انا هههه رحت اشارك زي كل البنات والستات اللى موجوده عادى راحو حاظرينى وبعتولي رساله انهم بحثو عن الايميل ووجده انه راجل وكانت الصدمه ازاي عرفو

ان اللى سجل ايميل راجل
مكنتش اعرف ان فى حاجه اسمها هكر (كنا طيبين قوي ياخال)
زعلت قوووى وخدت على خاطرى اخويه قالى خلاص
هعملك ايميل خاص بيكي وسجلي براحتك فى منتدى اهم حاجه يكون منتدى نسائى

وللحكايه بقيه