(صناعة الأمل واليقين بالله)
لما نركز فى طريقة عرض سورة الكهف وهى بتوصف (تفاصيل) نوم أصحاب الكهف والظروف اللى كانت محيطة بيهم يفتح عندنا باب للأمل فى رحمة ربنا وقدرته عز وجل فى تغيير كل الظروف والأوضاع المحيطة بينا..
وعشان نفهم الهدف من البوست لازم نعرف إن أسلوب القصص القرآن بيكون (ملخص) ودايما بيتجاهل التفاصيل الغير مفيدة فى القصة لكن لما يتم عرض أى تفاصيل في القصص بيكون ليها حكمة فى توصيل رسايل..
ازاى..
طريقة عرض تفاصيل نوم أصحاب الكهف سواءا فى مكانهم داخل الكهف أو زوايا سطوع الشمس وهما بيتقلبو وحماية الكلب ليهم وباقى التفاصيل الهدف منها توصيل رسالة ربانية لتوضيح الأسباب اللى ربنا سخرها ليهم عشان ينامو الفترة دى كلها ويتحقق دعوتهم لما طلبو من ربنا {ءَاتِنَا مِن لَّدُنكَ رَحۡمَةٗ وَهَيِّئۡ لَنَا مِنۡ أَمۡرِنَا رَشَدٗا}..
وبما القرآن كتاب للتدبر والفهم وإعمال العقل وكل واحد فينا بيحط نفسه فى كل آية ويفهم إنه مخاطب بيها يطمن لقدر الله وكل شوية يفتكر لما فتية الكهف طلبو من ربنا المدد والعون ربنا غيرلهم كل الظروف الطبيعية والبيئية والفيزيائية والمناخية..
الخلاصة..
اطلب من ربنا المدد والعون بصدق واخلاص واطمن تمامآ فى قدرة ربنا عز وجل يغيرلك كل الظروف المحيطة بيك عشان يحققلك طلبك..
وده يأكد لينا إن الأمل دايما موجود طول ما الواحد عنده ثقة ويقين ولازم الواحد يحسن الظن بالله..