(النتائج على ربنا)
أول وصية وردت فى سورة الكهف لسيدنا النبى عليه الصلاة والسلام (ولينا طبعا بالتبعية) إننا نعمل اللى علينا بس وما نشغلش نفسنا بالنتيجة..
ودى ظهرت معانا فى الآية رقم (٦)
فَلَعَلَّكَ بَاخِعٌ نَّفْسَكَ عَلَى آثَارِهِمْ إِن لَّمْ يُؤْمِنُوا بِهَذَا الْحَدِيثِ أَسَفًا
مفهوم_الآية
وصية ونصيحة لسيدنا النبى إنه ما يزعلش نفسه بسبب رفض الناس لدعوته وإن دوره هو الدعوة للتوحيد وبعد كدة كل واحد حر..
وبما إن القرآن كتاب للتدبر والفهم وإعمال العقل لما نحط نفسنا فى الآية دى نفهم إن المطلوب مننا السعى والمجهود والإخلاص فى العمل ومسألة النتائج دى نسيبها على ربنا عز وجل..
وهنا فيه نصيحة مهمة جدا للناس اللى بتقدم (محتوى مفيد وهادف) على السوشيال_ميديا وتحديدا الناس اللى مهتمين بمسألة #معركة_الوعي..
محدش يشغل دماغه بالتفاعل واللايك والشير لأن العدد عمره ما كان مقياس للنجاح المهم الرسالة توصل وتتقال..
ونعمل اللى علينا من غير يأس ولا إحباط ونسيب النتايج على ربنا عز وجل..
ملحوظة
* طبعا مطلوب دراسة النتائج قبل أى خطوة لأن غير كدة يعتبر مجهود على الفاضى..
كلمة (بَاخِعٌ نَّفْسَكَ) يعنى إنت هتموت نفسك من الحزن بسببهم..