العِلاقة الناجحة !
مش معناها إن في شخصين كاملين قابلوا بعض ..
لأ خالص؛ العِلاقة الناجحة يعني شخصين تقبلوا عيوب بعض وتعايشوا معاها ، شخصين بيضحوا في سبيل توازن ونجاح العِلاقة، طرف لما يشد التاني يرخي، طرف يطبطب وطرف يداوي، العِلاقات بتنجح بالتفاهُم والمودّة والرحمة💞
كان فيه مقولة للشيخ الشعراوي بيقول؛
“لن تحصل أبداً علي شيء كامل ،
ستحصل علي أشياء ناقصة تكتمل برضاك“
هيفضل الراجل بيدور على رجولته في عين مراته دونا عن اي حد تاني، ولو ما أخدهاش هيدور عليها في ست تانية!
وكذلك هتفضل الست بتدور على أنوثتها في عيون زوجها عشان تاخدها ولو مالقيتهاش بتبني لا اراديا بينه وبينها جسور وسدود، ويمكن تدور عليها عند أي راجل تاني او تطلب الانفصال لعلها تلاقيها عند راجل تاني!!
هيفضل الراجل محتاج للست، وهتفضل الست محتاجة الراجل عشان يكملوا بعض ويلاقوا احتياجاتهم.
وتوضيحا بس لبعض المفاهيم الغلط...الأنوثة في الست مش بس شكلها وجمالها ولبسها ودلعها، ولا الرجولة بس الزعيق والاوامر وحاضر والسيطرة...
بالعكس في راجل بيدور في الست على انوثة في شكل تاني، ان تكون دماغها حلوة، بيعرف يتناقش معاها، بيحب رأيها، بيحب جدعنتها طبعا بقدر، مش باستبدالها ليه..
وفي ست بتشوف الرجولة انها مدى قدرته على انه يفهمها, إنه يسمعها, انه يلين معاها، اد ايه هو متواضع معاها وبيعرف يفتحلها، ناشف قصاد الناس كلها وييجي عندها هي ويبقى سهل وحنين و يديها من وقته و يستمع....
غلطتنا ان احنا حطينا للمسميات دي تعريفات وقوالب خلت الستات مش مهتمة غير بالشكل والرجالة مش مهتمة غير بالسيطرة...
ياريت كل واحد يعيد التفكير في دوره و في احتياجه من الاخر ويبلغه بيها ويحكيله عنها، لو قدرنا نتكلم و نعبر من غير إنتقاد ولوم الدنيا هتوضح و هنعرف نوصل لبعضز
كفاية غموض الدنيا مش ناقصة طلاسم.
فتكم بعافية