يا اللي مصيفك بِوَسْط جنيف
وِمْن الطفش حجزك ألغيته


قررت تطلع على المالديف
من كُثر ما تسمع بصيته


رحَّال دايم بفصل الصيف
من أجل جوَّك تعنَّيْتَه


يمكن دلع يمكن إنَّه كيف
لكن حقيقه تماديته



كيف الصبر دون شوفك كيف
يا اللي عليَّه تغليته


حتى متى في وعودك زيف
وفي خُلفْ وعدي تفانيته


ودِّي نصيِّف بوسط الريف
في خايعٍ كم تمنيته


جمال ما ينحكي توصيف
لو جيت له ما تعديته



تعال لي لو مجرد طيف
من كم أنا ما تهنيته


يا حيف والله وْبعد يا حيف
على الذي في سويته


البُعد أشبه بحد السيف
والقُرب أنته تخطيته






سُهيل