،
*

أهلًا مجددًا ..

خاطري أفضفض شوي،
مع ان الاحتمال الاكبر محد بيقرأ كالعادة!
لكن مايهم لأني امر بحالة من الخوف على أهلي
وناسي وربعي وكل عزيز علي، بل حتى على نفسي ..
أدري هالشي من الشيطان،
وقاعدة اتعوذ من ابليس كل ما حسيت
ان هالافكار سيطرت عليّ بس فعلًا أحسني اواجه
مشكلة في التخطي من الصدمات اللي قاعدة تصيبني!

وايد ناس قاعدين يموتون من حولي،
والمشكلة فجأة وبدون مقدمات أو ممهدات لموتهم!
في هذه السنة شهدت أكثر من حالة وفاة لشخص
شفته يتحرك قدامي بكل قواه وعنفوانه في الحياة ..
يعني مثلًا بدأ الموضوع بوفاة دكتورتنا في الجامعة،
اللي علاقتي فيها سطحية ..
لكن بحكم ان تخصصي عملي أكثر من نظري،
احتكيت فيها بالواقع وسولفت وياه،
وفجأة بدون سابق انذار توفت وما كملت معانا لين تسليم الدرجات ..

بعدها بفترة،
جارنا اللي ساكن بالمنطقه اللي انا فيها ..
كل يوم من الصبح اشوفه وانا طالعه للدوام
وهو يتمشى بالكرسي المتحرك ومعاه العامله تدفه
ظاهريا ما يعاني من شيء لكن يمكن المشكله بالمفاصل،
وفجأة بدون سابق إنذار شفت لوحه مكتوب "عزاء فلان" وسهم على بيته!

قبل كم شهر،
كنت بأحد الفعاليات الدينية،
فجأة من غير سابق إنذار الكل قام من مكانه واصوات صياح ..
الناس قاعدة تطلع من المكان وانا ماعرف شالسالفة!
بعدين انصدم ان صديقتي ورفيقة دربي واختي توفت!!!!
وفي شو توفت؟ في نفس الفعالية الدينية
ولكن بمكان ثاني والخبر وصل للناس اللي معاي وكلهم طلعوا ..
صغيرة ، بعمري ، مافيها أي شي .. فجأة الموت خذاها!
ما صدقت .. رحت شفتها بالمغتسل،
وللحين صورتها ببالي .. أمها يا قلبي الله يصبرها،
أول ما شافتني انفجعت، تشوفني وتتذكر بنتها ..
تقول لي تعالي شوفي صديقتج شصار عليها!

ما نمت ليلتها،
وما طلعت من بالي ولا لحظة،
ما ادري اصيح عليها .. أو اصيح على نفسي؟
الواحد ما يدري بأي لحظة يموت،
وبأي مكان وبأي كيفية،
انا في غربة،
شو لو يصير لأحد من أهلي شي لا سمح الله!
كيف بقدر أكمل حياتي!
هواجس وهواجس وهواجس ..
فكرة تجر فكرة،
نسأل الله حسن الخاتمة.