أكبر غلطة بنرتكبها عمومًا في العلاقات: إننا بنِعرض نفسنا!
يعني بنبادر بالإعراب عن المشاعر بعفوية، ونطلب نبقى مع بعض على طول، ونقترح نشاطات مشتركة نعملها سوا، ومساحات للمودة نكون فيها مع بعض، اعتقادًا إن تقييم الطرف التاني هيكون زي تقييمنا للموضوع بالظبط، فيلا بينا نستمتع.
بس في الوقت اللي بيبقى قصدنا حاجة، بيفهم هو حاجة تانية، وبيستخف بينا وبحماسنا، وبيعتبر دي علامة على إنه أصبح شخص ما نقدرش نستغني عنه في حياتنا، ما يخوّله سلطة أكبر في التعامل معانا، ويدي له صلاحيات ما خطرش ببالنا نديهاله، وصولا لإنه ممكن يزهدنا في اللحظة التالية لما يحس إننا مدلوقين عليه كده، وإن ما بقاش فيه تحدي يخوضه عشان ينال إعجابنا!
بمعنى آخر: العفوية والتلقائية في التعبير عن المشاعر، والصدق والأريحية والطيبة، غالبا بتودّي في داهية، لكن الخبث والحوارات والتقل والصنعة والإيحاء بإننا مش فاضيين له طول الوقت وإن لينا عوالمنا الخاصة وحياتنا، وكرم أخلاق مننا بس إننا بندي له شوية وقت منها، هيخليه مشدود زي الوتر طول الوقت ومستني مننا إشارة عشان يجري يلبي احتياجاتنا وهو مبسوط وحاسس بالإنجاز!
"التظاهر" و"الادّعاء" في العلاقات -للأسف!- سيّدا الأخلاق!