.. اتمنى تقرأه الأخير ..
.. الشاعر الكبير. ..احمد ماضي .
( دير بالك ))
دير بالك ..
ياخذك واهس شعارات البلاط
كلها تبحث عل الكراسي
وكلها تنشد عن مفاتيح السجون
انته عدهم مو مهم .. جرحك يهون
...
انته محتاج اليكسر الك قيود
انته محتاج اليثبتلك عمود
لا تصدك ترتوي واتاني جود
هذا مو عباس واكَف عل الشريعه
هذا لو عباس .. جا ذب الزنود
...
هاي ناس تريد صوت
واحنه ناس انريد قوت
زحمة الألوان بيها اتغير اخيوط الضوه
وخلطة التركيب بيها لوثت طعم الهوه
اللسان اليحجي بسمك مو لسانك
والآذان الي تسمعه مو آذانك
صير شاطر
هي فرصة وطاحت ابطارف شليلك
صوتك ايثبت مصير
لا تنصب أي امير
نصب العنده ضمير
...
دير بالك
لا يرد الليل ويطفي الشموع
ولا تموت العين وتعيش الدموع
شنهو حلك..؟
من يطيح الصوت وابنادم يجوع
ومن تدكَـ بابك حمامة
وبس تفك الباب تتحول نســــــــــــــــــــــــــر
...
لا تطول ايدك عليك
لا تكَـص ايدك بديك
ودير بالك من اجيك
ووصل البابك ادكَـه
وبس تفك الباب اتحول نســـــــــــــــــــــــــر
...
دير بالك لا اموت
ومن اموت انته تموت
كَمره والخطار حوت
وباب رزق الله الوسيع
بس تفك الباب تالكَـالك نســـــــــــــــــــــــــر
...
انا اخاف اعليك من لون السواد
وانا اخاف اعليك من درب الرماد
الكل تسولف بالشمس
ومحد ايجيب الضوه
وكلها تحلف بالجرح
ومحد ايحطلك دوه
...
دير بالك ..
لا يخليك الألم تتمنه امس
لازم من البارحة تاخذ درس
انته باقي .. وغيرك الباقي ابفلس
ودير بالك .. بس تحط لأسمك ثمن
ايطيح من عينك وطن
...
دير بالك ..
لا ترد تبني صنم
وانا ادري السجه دم
وذاك من ذاك السلم
وما توصخ من لزم بيده قلم
...
دير بالك ..
لا تمل درب الصبر
حتى من اتضوك مر
اليوم باجر مو بعيده
يرجع الدم الوريده
وينختنكَـ صوت الكفر